‘टीकापुर साहित्य महोत्सव’को दोस्रो संस्करण यही फागुन २४ देखि २६ गतेसम्म आयोजना हुने भएको छ। दोस्रो संस्करण नेपालका प्रथम नाटककार तथा सुदूरपश्चिमका राष्ट्रिय गौरव पहलमानसिंह स्वाँर विशेष हुने आयोजकले जनाएको छ ।
‘पहलमानसिंह स्वाँर साहित्य विशेष संस्करण’ नाम दिइएको महोत्सव लेखक तथा अध्येता हरि शर्माको प्रवचनबाट थालनी हुने बताइएको छ । त्यस्तै पहिलोपटक साहित्यकार अभि सुवेदी महोत्सवमा छलफलका लागि पुग्नेछन् ।
महोत्सवमा २१ बहस सत्रहरू रहने छन् । आख्यान, गैरआख्यान तथा नेपाली साहित्यको समालोचनालगायतका विषयमा छलफल हुनेछन् ।
दोस्रो संस्करण ‘पहलमानसिंह स्वाँर साहित्य विशेष संस्करण’ भएकोले अग्रज साहित्यकार पहलमानसिंह स्वाँरका सम्बन्धमा पनि विशेष प्रस्तुति तथा छलफल हुने आयोजकको भनाइ छ ।
