काठमाडौँ । नवनियुक्त स्वास्थ्य तथा जनसंख्यामन्त्री डा. सुधा शर्मा गौतमले आइतबार औपचारिक रूपमा पदभार ग्रहण गरेकी छन्। राष्ट्रपति समक्ष पद तथा गोपनीयताको सपथ लिएलगत्तै उनले रामशाहपथस्थित मन्त्रालयको कार्यकक्षमा पुगेर कार्यभार सम्हालेकी हुन्।
प्रधानमन्त्री सुशीला कार्कीले आइतबारै डा. शर्मालाई स्वास्थ्य तथा जनसंख्यामन्त्रीमा नियुक्त गरेकी थिइन्। भदौ २४ गते जेनजी प्रदर्शनका क्रममा स्वास्थ्य मन्त्रालय भवनमा आगजनी भएपछि मन्त्रालय हाल *स्वास्थ्य अनुसन्धान परिषद् (NHRC)*को भवनबाट सञ्चालन हुँदै आएको छ।
योग्यताका हिसाबले डा. शर्मा प्रसूति तथा स्त्री रोग विशेषज्ञ हुन्। उनले यसअघि पनि स्वास्थ्य मन्त्रालयमै सचिवका रूपमा २०६५ असोजदेखि २०६८ मंसिरसम्म काम गरेकी थिइन्।
पदभार ग्रहणपछि उनले स्वास्थ्य सेवामा सुशासन, पारदर्शिता र सेवा प्रभावकारितालाई मुख्य प्राथमिकता दिने प्रतिबद्धता व्यक्त गरेकी छन्। उनका अनुसार जनताको विश्वास जित्न व्यावहारिक र परिणाममुखी काम नै आफ्नो पहिलो लक्ष्य हुनेछ।
