काठमाडौं । विभिन्न विद्यार्थी सङ्गठनहरूले विद्यार्थी सङ्गठन खारेजीको प्रयास अलोकतान्त्रिक र असंवैधानिक भएको जिकिर गरेका छन्।
मंगलबार संवाद डबलीमा आयोजित कार्यक्रममा संयुक्त विद्यार्थी सङ्गठनहरूले स्कुल–कलेजमा प्रहरी पोस्ट राख्ने तयारीलाई कडा शब्दमा विरोध गर्दै यस्तो कदमले सरकार पतनको बाटोमा जाने दाबी गरेका हुन्।
नवीन पौडेल, नेपाल विद्यार्थी सङ्घका कार्यवाहक अध्यक्ष, ले क्याम्पसहरूमा प्रहरी पोस्ट स्थापना गर्ने तयारीलाई असंवैधानिक भन्दै आपत्ति जनाए। “यदि विश्वविद्यालय र क्याम्पसमा ब्यारिकेट राखिए देशमा गृहयुद्ध निम्तिन सक्छ, के सरकारसँग त्यसलाई सम्हाल्ने क्षमता छ?” उनले प्रश्न गरे।
नेकपा निकट अखिल (क्रान्तिकारी) का अध्यक्ष विजय प्रकाश शर्मा सापकोटा ले सत्ता र शक्तिको आडमा विद्यार्थी सङ्गठन खारेज गर्ने सोच घातक हुने बताए। उनले इतिहास स्मरण गराउँदै दमनकारी प्रवृत्तिले सधैं प्रतिरोध जन्माएको दाबी गरे।
धर्मेन्द्र बास्तोला नेतृत्वको नेकपा (बहुमत) निकट अखिल (क्रान्तिकारी) का अध्यक्ष वीरेन्द्र शाह ले सरकारलाई राष्ट्रिय तथा अन्तर्राष्ट्रिय कानुन र विद्यार्थी आन्दोलनको इतिहास अध्ययन गर्न सुझाव दिए।
एमाले निकट अनेरास्ववियुका सचिव समिम बाबु खान ले सरकार दुईतिहाइको दम्भमा अघि बढेको आरोप लगाए। उनले परिवर्तनका हरेक चरणमा विद्यार्थीहरूको भूमिका महत्त्वपूर्ण रहेको उल्लेख गर्दै त्यसलाई कमजोर पार्ने प्रयास असफल हुने दाबी गरे।
अखिल (क्रान्तिकारी) का अध्यक्ष महेश श्रेष्ठ ले वैधानिक संघ–संगठनमाथि प्रतिबन्ध लगाउने प्रयास तानाशाही प्रवृत्ति भएको बताए।
जनपक्षीय विद्यार्थी सङ्गठनकी अध्यक्ष सुनिता बुढाथोकी ले यस्तो कदमले देशलाई पञ्चायत र राणाकालअघिको अवस्थातर्फ धकेल्ने चेतावनी दिइन्।
वैज्ञानिक समाजवादी विद्यार्थी सङ्गठनका अध्यक्ष हिमांशु ले युवा–विद्यार्थीहरूको राजनीतिक चेतना कमजोर पार्ने उद्देश्यले सङ्गठन खारेजीको प्रयास भएको आरोप लगाए।
विप्लव नेतृत्वको नेकपा (माओवादी) निकट अखिल समाजवादीका सचिव कपिल सिजापति ले बन्दुकको बलमा विद्यार्थी आवाज दबाउने प्रयास गरे त्यसको गम्भीर परिणाम आउने चेतावनी दिए।
अखिल छैटौँका अध्यक्ष सुवास जिसी ले क्याम्पसमा प्रहरी चौकी र ब्यारिकेट राखेर विद्यार्थीलाई तर्साउने काम सरकारका लागि घातक हुने बताए।
कार्यक्रममा सहभागी नेताहरूले विद्यार्थी सङ्गठनमाथि प्रतिबन्ध लगाउने कुनै पनि प्रयासको सशक्त प्रतिवाद गर्ने चेतावनी दिएका छन्।
