काठमाडौंमा रातिको समयमा बहुमूल्य वस्तु चोरी गर्ने एक गिरोहलाई प्रहरीले पक्राउ गरेको छ । सिन्धुपाल्चोकको तौथली गाउँपालिका वडा नम्बर ७ घर भई काठमाडौंको बूढानीलकण्ठ बस्ने सुमन भन्ने बिष्णु श्रेष्ठ र मकवानपुरको थाहा नगरपालिका ९ घर भई हाल काठमाडौंको ठमेलमा बस्ने बिकास देउला (पोडे) लाई उपत्यका अपराध अनुसन्धान कार्यालयको प्रहरी टोलीले पक्राउ गरेको हो ।
उनीहरूले रोलेक्स, ओमेगा, राडो ब्रान्डका घडी, सुन र हिरा गरी ८५ लाख २६ हजार ९ सय रुपैयाँको सामान चोरी गरेको प्रहरीले जनाएको छ । यो प्रकरणमा पक्राउ परेका बिष्णु श्रेष्ठविरुद्ध यसअघि काठमाडौका विभिन्न प्रहरी इकाइमा चोरीलगायतका ६ वटा मुद्दा चलेको समेत प्रहरीले जनाएको छ ।
