बुद्ध योन्जन लामा सिन्धुपाल्चोक
ह्योन्जनको सामुहिक कूलपूजा र ऐतिहासिक भेला सम्पन्न भएको छ । लिसंखुपाखार गाउँपालिका–२ लिसंखु (ह्रिस्याङ्गो) मा रहेको छ्योइफेल कुन्देलिङ गोन्पामा यही ६ र ७ गते सम्पन्न भएको हो ।
तामाङ जातिको ह्योन्जन थरका कुलपूजा परम्परालाई यथावत् र विश्वका ह्योन्जनलाई एकता गर्ने उद्देश्यकासाथ ह्योन्जन वशं समाजले आयोजना गरेको ऐतिहासिक कार्यक्रम ह्योन्जनको थाकथलो ह्रिस्याङ्गोमा सम्पन्न भएको हो । सो कार्यक्रममा नेपालको ४४ वटा जिल्ला, भारतको सिक्किम, दार्जिलिङ, मिरिक, खार्साङलगायतका स्थानहरुबाट ३१० जना प्रतिनिधि र स्थानीयहरुको सहभागीता रहेका थिए ।
कार्यक्रमको अघिल्लो दिन मै गोन्पामा साङसेर्गेम, म्हेर्मे पूजा र माहाकालको पूजा भएको थियो । ६ गते बिहान ७ बजेदेखि करिब ११ बजेसम्म बिशेष सामुहिक कूलपूजा भएको थियो । दिउँसो गोन्पाका लामाहरुले लामा छ्याम (नृत्य), स्थानीय कलाकारहरुले ताम्बा गीत र नृत्य, त्यस्तै विभिन्न जिल्लाबाट सहभागी ह्योन्जन स्रष्टा तथा कलाकारहरुले गीत र कवित प्रस्तुत गरिएको थियो भने योन्जन वंशको शफ्टवेरको विकास र तथ्यांक विवरण भर्ने सम्बन्धी प्रशिक्षण समेत भएको थियो ।
७ गते वंशको नाममा ८ रोपनी जग्गा दान गर्नुहुने स्थानीय दाताहरुलाई समापन, व्यवस्थापन गर्ने स्थानीय र सहभागी सबैलाई प्रशंसा पत्र प्रदान गर्दै कार्यक्रम सम्पन्न भएको थियो । प्रत्येक ५÷५ वर्षमा यस्तो कार्यक्रम गरिने योन्जन वशं समाजको अध्यक्ष महेन्द्रजंग तामाङले बताउनु भएको छ । ‘ह्रिस्याङगो घोषणा पत्र’ २०८१ बैशाख ६ र ७ गते, ह्रिस्याङगो लिसंखुपाखर —२, सिन्धुपाल्चोक ।
हामी लिसंखुपाखर गाउँपालिका वडा नं—२, ह्रिस्याङ्गोमा ह्योन्जन वंशको सामुहिक कुल पूजा तथा ऐतिहासिक भेला–२०८१ मा सहभागी हुनु भएका संसारभरीका ह्योन्जन सन्तानहरुले आफ्नो परम्परादेखि चलिआएको ‘कुलपूजा परम्परा’ आज मिति २०८१ बैशाख ६ गते (तदनुसार २०२४ अप्रील १८) मा भव्यताकासाथ ‘सामुहिक रुपमा’ सम्पन्न गरेका छौं । यसै अवसरमा हामी ‘ह्योन्जनहरुको ऐतिहासिक भेला’ पनि यही बैशाख ७ गते सम्पन्न गरेका छौं ।
यस पावन अवसरमा देश विदेशबाट पाल्नु हुने समस्त ह्योन्जन सन्तानहरुका तर्फबाट निम्न प्रतिबद्धता जाहेर गर्दै यो ह्रिस्याङगो घोषणा पत्र जारी गर्दछौं ।
१, कुलपूजा परम्परालाई यथावत् राख्न र एकरुपता दिन जरुरी भएकाले प्रत्येक ५ वर्षमा एक पटक सामुहिक रुपमा भेला हुने र ‘कुलपूजा’ गर्ने परम्परालाई कायम राख्ने घोषणा गर्दछौं ।
२, ह्योन्जन समाजको बंशावलीलाई पूरा गर्न शफ्टवेरको विकास गरिएको हँुदा ह्योन्जनहरु जहाँजहाँ रहेपनि आगामी ५ वर्षभित्रमा सबैले आआफ्नो तथ्याङ्क(डाटा) भरी सक्ने र बंशावली लेखन कार्यलाई सम्पन्न गर्न सहयोग गर्ने प्रतिबद्धता जाहेर गर्दछौ ।
३, ह्योन्जन समाजको ऐतिहासिक, धार्मिक, साँस्कृतिक महत्वका स्थान, लेख, ताम्रपत्र, शनदपत्र, रुक्कापत्र, फाराप, दोङराप, केरापआदि दस्तावेजहरुको खोज, अनुसन्धान, संकलन एवं विश्लेषण गर्ने र त्यसलाई टुङ्गोमा पु¥याउन लागि पर्ने प्रतिबद्धता जाहेर गर्दछौ ।
४, ह्रिस्याङ्गो आसपासको क्षेत्र ठुलो धादिङ, वाफललगायतका क्षेत्रमा रहे भेटिएका ऐतिहासिक, धार्मिक, साँस्कृतिक महत्वका वस्तुहरुको संरक्षण, विकास र प्रवद्र्धनका लागि आवस्यक कामलाई अघि बढाउन आवश्यक सबैखाले पहलकदमी गर्ने प्रतिबद्धता जाहेर गर्दछौं ।
५, ह्रिस्याङ्गोमा रहेको पुरानो ध्याङ डाँडा (लगभग १२ सय वर्ष पुरानो गुम्बा), ङ्हारदिम (रुवाङ्छु म्हेमेले बनाउनु भएको ढुंगामाटोको पहिलो घर) कालो पाटी आदिको संरक्षण र विकास के कसरी गर्ने भन्ने विषयमा छलफल गरी डिपिआर बनाउने र ह्रिस्याङ्गोलाई एउटा पर्यटकीय क्षेत्रको रुपमा विकास गर्न पहल गर्ने प्रतिबद्धता जाहेर गर्दछौं ।
६, यो सबै कार्य गर्न आर्थिक, भौतिक एवं बौद्धिक ज्ञानको आवस्यकता हुने हुँदा त्यसका लागि आ–आफ्नो ठाँउबाट हामी सबैले पहल गर्ने र आँटेको कार्य पूरा गर्नका लागि लागीपर्ने प्रतिबद्धता जाहेर गर्दछौं ।
७. ह्योन्जन वंशको विकासका लागि ह्योन्जन विकास कोष निमार्ण गर्ने अभियानलाई तत्काल प्रारम्भ गर्ने ।
