जिरी माध्यमिक विद्यालय: गौरवशाली इतिहाससँगै चुनौती र अवसर

जिरी । दोलखा जिल्लाको शैक्षिक धरोहरका रूपमा स्थापित जिरी माध्यमिक विद्यालयले वि.सं. २०१७ सालदेखि निरन्तर शिक्षा, सीप र ज्ञान प्रवाह गर्दै आएको छ। स्थापना कालदेखि नै दोलखा, रामेछाप र सोलुखुम्बुका विद्यार्थीहरूलाई शैक्षिक उज्यालो प्रदान गर्दै आएको यस विद्यालयले आज राष्ट्रिय तथा अन्तर्राष्ट्रिय क्षेत्रमा सफल व्यक्तित्व उत्पादन गर्दै आफ्नो गरिमा कायम राखेको छ।

विद्यालयलाई “ज्ञानको मन्दिर” का रूपमा व्याख्या गर्दै यहाँ सबैको पहुँच खुला रहेको उल्लेख गरिएको छ। तर पछिल्ला करिब दुई दशकदेखि नैतिक शिक्षाको अभावले समाजमा नैतिकताको कमी महसुस हुन थालेको चिन्ता व्यक्त गरिएको छ।

भौतिक पूर्वाधारको हिसाबले विद्यालय नमुनायोग्य अवस्थामा पुगेको छ भने शैक्षिक नतिजाका आधारमा जिल्लाका सामुदायिक विद्यालयहरूमध्ये उत्कृष्ट संस्थाका रूपमा परिचित छ। यस सफलताको श्रेय विद्यार्थीको मेहनत, अभिभावकको सहयोग, विद्यालय व्यवस्थापन समितिको मार्गदर्शन तथा शिक्षकहरूको समर्पणलाई दिइएको छ।

तर नवनिर्मित संरचनासँगै सञ्चालन खर्च पनि बढेको छ। मासिक विद्युत् शुल्क मात्र ३५ हजारदेखि ४४ हजार रुपैयाँसम्म पुग्ने गरेको छ भने सरसफाइ, मर्मतसम्भार र शिक्षक व्यवस्थापनमा निजी स्रोतमा निर्भर रहनुपरेको अवस्था छ। सरकारी अनुदान अभावका कारण अभिभावक र दाताहरूको सहयोग नै मुख्य आधार बनेको विद्यालयले जनाएको छ।

यसबीच सामाजिक सञ्जालमा केही व्यक्तिहरूबाट विद्यालयप्रति नकारात्मक टिप्पणी भइरहेकोप्रति असन्तुष्टि व्यक्त गरिएको छ। विद्यालयले यस्ता टिप्पणीहरूको प्रत्यक्ष बहस र प्रष्टिकरणका लागि सधैं तयार रहेको स्पष्ट पारेको छ। विशेषगरी विद्यालयसँग प्रत्यक्ष सम्बन्ध नराख्ने व्यक्तिहरूबाट आलोचना बढी आएको आरोप पनि लगाइएको छ।

विद्यालयले सकारात्मक सुझावलाई स्वागत गर्दै आगामी दिनमा सामाजिक सञ्जालका सकारात्मक र नकारात्मक अभिव्यक्तिहरू संकलन गरी अभिलेखीकरण गर्ने योजना अघि सारेको छ। यसका लागि पाँच वर्षसम्म नियमित रूपमा सामग्री संकलन गरिने र पुस्तकालयमा सुरक्षित राखिने जनाइएको छ। भविष्यमा अनुसन्धानकर्ताहरूका लागि उपयोगी दस्तावेज तयार गर्ने उद्देश्य राखिएको छ।

प्रधानाध्यापक कुमार जिरेल सामाजिक सञ्जालमा लेख्नुहुन्छ