काठमाडौं। युरोपियन च्याम्पियन्स लिग फुटबलअन्तर्गत अन्तिम १६ को पहिलो लेगमा साविक विजेता पेरिस सेन्ट जर्मेन (पीएसजी) ले इंग्लिस क्लब चेल्सीलाई ५–२ गोलअन्तरले पराजित गरेको छ।
घरेलु मैदानमा बुधबार राति भएको खेलमा पीएसजीले उत्कृष्ट आक्रमणात्मक प्रदर्शन गर्दै चेल्सीलाई दबाबमा राखेको थियो। पीएसजीको जितमा ख्विचा भरात्सिखेलाले दुई गोल गर्दा ब्राड्ली बार्कोला, ओस्मान डेम्बेले र भितिन्हाले एक–एक गोल गरे। चेल्सीका मालो गस्टो र एन्जो फर्नान्डेजले भने एक–एक गोल फर्काए।
खेलको १०औं मिनेटमा बार्कोलाले गोल गर्दै पीएसजीलाई सुरुआती अग्रता दिलाए। २८औं मिनेटमा गस्टोले गोल गर्दै चेल्सीलाई बराबरीमा ल्याए। तर ४०औं मिनेटमा डेम्बेलेले गोल गरेपछि पीएसजी पहिलो हाफ २–१ ले अघि रह्यो।
दोस्रो हाफमा चेल्सीले खेलमा फर्किने प्रयास गर्यो। ५७औं मिनेटमा एन्जोले गोल गर्दै अन्तर घटाए पनि त्यसपछि पीएसजीले खेलमा पूर्ण नियन्त्रण जमायो।
७४औं मिनेटमा भितिन्हाले गोल गर्दै पीएसजीको अग्रता फराकिलो बनाए। त्यसपछि ८६औं मिनेटमा र इन्जुरी समयको चौथो मिनेटमा भरात्सिखेलाले गोल थप्दै पीएसजीलाई ५–२ को शानदार जित दिलाए।
यस नतिजासँगै पीएसजीले दोस्रो लेगअघि बलियो अग्रता बनाएको छ। अब चेल्सीले आगामी साता आफ्नै मैदानमा हुने दोस्रो लेगमा कम्तीमा चार गोलको अन्तरले जित निकाल्नुपर्ने दबाबमा परेको छ।
