राष्ट्रिय सभामा नेपाली कांग्रेसका सांसद आनन्दप्रसाद ढुङ्गानाले प्रधानमन्त्री प्रचण्डले सत्ता गठबन्धन परिवर्तन गरेर सत्तामा बस्न बिहारका मुख्यमन्त्री नितिश कुमारको शैली पछ्याएको बताएका छन् । मंगलबार कांग्रेस सांसद युवराज शर्मालाई राष्ट्रिय सभा अध्यक्षमा निर्वाचित गरियोस् भन्ने प्रस्ताव प्रस्तुत गर्दै ढुङ्गानाले बिहारका मुख्यमन्त्री नितिशकुमारले ९ पटक गठबन्धन फेरेर सरकारका बसेका कारण उनलाई त्यहाँ ‘पल्टुराम’ भन्ने गरेको बताउँदै प्रचण्ड पनि त्यही बाटोमा रहेको बताए ।
जनताले दिएको म्यान्डेटभन्दा प्रधानमन्त्री बाहिर गएको उनले बताए । ढुङ्गानाले भने–‘हामी यो देशमा संघीय गणतन्त्रलाई व्यवस्थित गर्छौँ, यो संविधानका लागि हामी लडेका हौँ, साँच्चै नै यो संविधानप्रति हामी इमानदार हौँ भने जनताले अल्टन पल्टन गर्न म्यान्डेड दिएका हैनन् ।
तपाई पदका लागि कहिले यता, कहिले उता गरिराख्नुस् भनेर दिएको हैन । तर अरू कसैलाई आरोप लगाउँदै गर्दा आफ्नो अनुहार ऐनमा हेर्न सक्नुपर्छ ।’
अहिले प्रधानमन्त्रीले गठबन्धन भत्काउने र अर्को बनाउने क्रियाकलापले देश अस्थिरतामा गएको बताए । उनले कांग्रेसको तर्फबाट अध्यक्षका उम्मेदवार रहेका शर्मा देशको राजनीतिमा लामो संघर्ष गरेको व्यक्ति रहेको, २०२४ सालदेखि विद्यार्थी राजनीतिबाट अघि बढेको व्यक्ति रहेको जानकारी गराए ।
