काठमाडौं- प्रतियोगी नम्बर १४ काभ्रेका अतित लामा बोम्जनले पहिलो मिस्टर तामाङ २०२४ उपाधी हात पारेका छन् ।
मंगलवार जमलस्थित राष्ट्रिय नाचघरमा भएको ग्राण्ड फिनालेमा उनले १४ जनालाई पछाडि पार्दै उपाधी हात पारेका हुन् ।
‘आधुनिक समाजमा टेक्नोलोजीले सम्बन्ध र सन्चारलाई कसरी प्रभाव पारेको छ ?’ भन्ने निर्णायकको प्रश्नका अतितले आधुनिक समाजमा सञ्चार एवं प्रविधि दुवैले पारदर्शी र निकट सम्बन्ध बढाइरहेको भन्दै जवाफ दिएका थिए ।
त्यस्तै, फर्स्ट रनरअप प्रतियोगी नम्बर ९ काभ्रेका अनिल तामाङ र प्रतियोगी नम्बर १ झापाका विश्वराज स्याङ्बो सेकेन्ड रनरप भएका छन् । विजेता तीनै जनाले क्रमश : क्राउनसहित ५० हजार,३० हजार र २० हजार रुपैयाँ नगद पुरस्कार प्राप्त गरेका छन् ।
प्रतियोगितामा टप १५, टप १० र टप ६ हुँदै उत्कृष्ट तीन प्रतियोगीको छनोट गरिएको थियो । प्रतियोगितामा फोटोजेनिक अवार्ड बिक्रम तामाङ,बेस्ट वाक अवार्ड रबिन घिसिङ तामाङ, पब्लिक चोइस र मिस्टर पपुलर अवार्ड प्रयास गोले, बेस्ट पर्सनालिटी अतित लामा,मोस्ट डिसिप्लिन अवार्ड सुशील बोम्जन,बेस्ट स्माइल अवार्ड भुपेन्द्र लोप्चन र बेस्ट फ्रेन्डसीप अवार्ड रितिन दोर्जे लामाले हात पारेका छन् ।
मम्स इन्टरनेशलन नेपालले तामाङ भाषा, धर्म, कला, भेषभूषा, रीतिरिवाज, संस्कृति, रहनसहनलाई तामाङ युवापुस्तामाझ पुर्याउने उद्देश्यले प्रतियोगिताको आयोजना गरेको हो ।
प्रतियोगिताको यो पहिलो संस्करण हो । १६ देखि ३० वर्षसम्मका पाँच फिट उचाइ भएका देश भरिका तामाङ युवाहरुलाई प्रतियोगिताका लागि आवेदन दिन आह्वान गरिएको थियो ।
