राजधानीको ललितपुरमा सात दिने बिनायो बाजा निर्माण प्रशिक्षण सुरु भएको छ ।
आदिवासी जनजाति राष्ट्रिय उत्थान प्रतिष्ठानको आर्थिक सहयोगमा किरात मुन्दुम अध्ययन केन्द्रले प्रशिक्षण थालेको हो । आइतबार प्रशिक्षणको उद्घाटन भएको हो ।
प्रशिक्षणले किराती समुदायको सांस्कृतिक बाजा बिनायो संरक्षणमा टेवा पुग्ने किरात राई यायोक्खाका उपाध्यक्ष जनक राईले विश्वास व्यक्त गरे ।
प्रशिक्षण कार्यक्रमको सफलताको कामना गर्दै उनले प्रशिक्षणमार्फत् नयाँ पुस्ताले परम्परागत मौलिक बाजा निर्माण मात्र नभएर प्रयोग (बजाउन) पनि सिक्ने अपेक्षा रहेको बताए ।
‘किरात मुन्दुम अध्ययन केन्द्रले ‘किरात मुन्दुम रिसिया’ पुस्तक प्रकाशन गरेर मुन्दुम दस्तावेजीकरणमा ठुलो योगदान गरेको छ’, उनले भने, ‘परम्परागत बाजा बिनायो प्रशिक्षण कार्यले पनि लोप हुन लागेको यो मौलिक बाजाको संरक्षणमा युवा पुस्तालाई जोड्नेछ ।
’ केन्द्रका अध्यक्ष तथा गायक÷सङ्गीतकार जीतेन राईले अब शास्त्रीय कला तथा सङ्गीतको अन्वेषण गर्नुपर्ने समय भएको बताए । ‘समाजलाई सुसंस्कृत बनाउनका लागि हामी सचेत हुनुपर्छ’, उनले भने, ‘हामीले हाम्रा शास्त्रीय सङ्गीत र संस्कारहरू खोजी गर्ने बेला भएको छ ।’ यस्ता चिजहरूलाई प्राज्ञिक क्षेत्रमा अभ्यास तथा अन्वेषणको खाँचो रहेको उनले बताए । शैक्षिक क्षेत्रमा यस्ता विषयको बहस तथा शिक्षण सिकाइ हुनुपर्ने उनको भनाइ छ ।
शैक्षिक क्षेत्रमा यसको प्रवेशले मात्र दिगो रूपमा बचाइराख्न सकिने उनको धारणा छ । शनिबारसम्म चल्ने प्रशिक्षणमा २० जना प्रशिक्षार्थी सहभागी छन् ।
