दोलखाको राजनीति सधैँ केन्द्रको छायाँमा परेको कथा हो। सडक माग्दा वर्षौं कुर्नुपर्ने, बाढी–पहिरोले बस्ती बगाउँदा पनि राजधानीमा आवाज नसुनिने, युवाले रोजगारी खोज्दै गाउँ छाड्दा नेतृत्व मौन रहने-यी सबै दोलखाली जनताको साझा पीडा हुन्। यही पीडाबाट जन्मिएको प्रश्न आज फेरि दोहोरिएको छ-दोलखाले कस्तो प्रतिनिधि चाहन्छ ?यो प्रश्नको उत्तर केवल दल, झण्डा वा चुनावी नारा होइन। यो उत्तर संघर्ष, अनुभव र दृष्टिकोणसँग गाँसिएको हुनुपर्छ। यही सन्दर्भमा विशाल खड्काको नाम केवल उम्मेदवारका रूपमा होइन, दोलखाको सम्भावनासँग जोडिएको प्रतिनिधित्वका रूपमा उठिरहेको छ।
संघर्षबाट निस्किएको राजनीतिक चेतना
विशाल खड्काको राजनीतिक यात्रा कुनै सुविधाजन्य उत्तराधिकार होइन। किसान परिवारमा जन्मिएर श्रम, अभाव र वर्गीय विभेदको यथार्थ भोग्दै हुर्किएको जीवनले उहाँको चेतनालाई समयमै राजनीतिक बनायो। १६ वर्षकै उमेरमा राज्यको दमन खेप्नु, जेल जीवन बिताउनु र यातनाका बीच पनि विचार र अध्ययन नछोड्नु-यी घटना जीवनीका पङ्क्ति मात्र होइनन्, नेतृत्वको चरित्र निर्माण गर्ने पाठ हुन्।
दोलखाली जनताले बारम्बार गुनासो गर्ने एउटा विषय छ “हामीलाई बुझ्ने नेता छैन।” विशाल खड्काको जीवन यात्राले यही अभावलाई चुनौती दिन्छ। जसले भोगेको छ, उसैले बुझ्छ। जसले संघर्ष चिनेको छ, उसैले समाधान खोज्छ। यही कारण विशाल खड्का दोलखाली पीडासँग कृत्रिम होइन, प्राकृतिक रूपमा जोडिएका नेता हुन्।
भाषणभन्दा काममा देखिएको क्षमता
राजनीतिमा भावनात्मक अपिल मात्र पर्याप्त हुँदैन। कार्यान्वयन गर्ने क्षमता नहुँदा राम्रो विचार पनि भाषणमै सीमित हुन्छ। प्रदेशसभा सदस्य र बागमती प्रदेश सरकारका वन तथा वातावरण मन्त्रीका रूपमा विशाल खड्काले यो कमजोरीलाई तोडेका छन्।दोलखाको पहिचान केवल जलविद्युत् वा हिमालमा सीमित नराखी पर्यटन, कृषि र संस्कृतिसँग जोड्ने दृष्टिकोण आजको आवश्यक राजनीति हो, जुन विशाल खड्काले अभ्यासमै उतार्न खोज्नुभएको छ।
दोलखाको मुद्दा, संघीय संसदको बहस
संघीय संसदमा दोलखाको प्रतिनिधित्व केवल उपस्थिति होइन, प्रभावकारी आवाज हुनुपर्छ। भौगोलिक कठिनाइ, कमजोर पूर्वाधार, युवाको पलायन, कृषिको संकट र पर्यटनको अपार सम्भावना- यी सबै विषय नीति तहमा बलियो रूपमा उठाउन सक्ने नेतृत्व दोलखालाई चाहिएको छ।
विशाल खड्काको विशेषता यहीँ छ। उहाँ केन्द्र र स्थानीय आवश्यकताबीच पुल बन्न सक्ने नेता हुनुहुन्छ। यदि उहाँ प्रतिनिधिसभामा पुग्नुभयो भने सडक, ऊर्जा, शिक्षा, स्वास्थ्य र रोजगारीका सवालमा दोलखाको मुद्दा कागजमा होइन, बहसको केन्द्रमा पुग्नेछ। दोलखाको आवाज संसदमा पुग्नु भनेको विकासको ढोका खोलिनु हो।
निष्ठा, सादगी र वैचारिक स्पष्टता
आजको राजनीतिमा सबैभन्दा अभाव भएको गुण हो-निष्ठा। पद, पहुँच र सम्पत्तिले राजनीति मापन हुने बेला विशाल खड्काको सादगी, अध्ययनशीलता र निरन्तर लेखनले फरक पहिचान बनाएको छ। राजनीति उहाँका लागि व्यापार होइन, प्रतिबद्धता हो भन्ने कुरा जीवनशैलीमै देखिन्छ।
जनतामा बढ्दै गएको राजनीतिक निराशाबीच विशाल खड्काजस्ता नेताले आशाको सम्भावना देखाउँछन्। विचारमा स्पष्ट, जीवनमा सरल र व्यवहारमा जिम्मेवार नेतृत्व आजको दोलखाको आवश्यकता हो।
व्यक्तिको होइन, भविष्यको चुनाव
अबको निर्वाचन कुनै एक व्यक्तिको जित–हारको सवाल मात्र होइन। यो दोलखाको दिशानिर्णय हो। संघर्ष, अनुभव र स्पष्ट दृष्टि बोकेका विशाल खड्कालाई जिताउनु भनेको दोलखाको आवाजलाई संघीय संसदमा बलियो बनाउनु हो।
दोलखाले धेरै प्रतीक्षा गरिसकेको छ। अब प्रतीक्षा होइन, प्रतिनिधित्व चाहिएको छ। विशाल खड्काको विजय व्यक्तिको विजय होइन-यो दोलखाको समृद्ध, न्यायपूर्ण र सम्मानित भविष्यको विजय हुनेछ।
