भीमेश्वर नगरपालिका ८, गोठिगाउँ घर भएका गायक तथा संगीतकार बाबु राम मोक्तानले तामाङ भाषामा ‘ए ग्याम थारेङ’ नयाँ गजल भिडियो बजारमा ल्याएको छ ।
गत हप्ता भक्तपुरमा सो भिडियो सार्वजनिक गरिएको हो । उनी तीन दशकदेखि गीत संगीत क्षेत्रमा क्रियाशिल छन् । कुमार स्याङबाको शब्द, निमा दोङको संगीत, पवन वाङ लामाको म्युजिक संयोजन रहेको उक्त गजलमा बाबु राम मोक्तान आफैले स्वर दिएका छन् ।
भिडियोमा बाबु राम मोक्तान, अपेक्षा बोहरा र प्रविन्स मोक्तानले अभिनय गरेका छन् । उक्त म्युजिक भिडियोले अहिले चर्चा बटुलिरहेको छ । पछिल्लो समय तामाङ संगीत क्षेत्रमा गजलले कलाकारहरुलाई लोभ्याइरहेको छ । यसैबीच मोक्तानले ए ग्याम थारेङ ल्याएका छन् ।
दर्शक र स्रोताको मनलाई भिडियोले आकर्षित गरिएको पाइन्छ । नयाँ पुस्ताको कथा, जीवन पद्धति, प्रेम, विवाह र वियोगका प्रतिविम्वलाई उक्त गजलमा प्रस्तुत गरिएको छ । कतिपय रहर, बाध्यता र समयले धकेलेको ती जीवनका घुम्तीहरुलाई ए ग्याम थारेङको कथामा सिलसिला दिइएको छ ।
