नेकपा माओवादी केन्द्र निकट तामाङ राष्ट्रिय मुक्ति मोर्चा नेपालको अध्यक्षमा रामेछापका २०६४ का संविधान सभा सदस्य डिल्लीमान तामाङ निर्वाचित भएका छन् ।
पूर्ण ताम्सालिङ प्रदेश स्थापना गरौँ, समाजवादी क्रान्तिको बाटोमा अघि बढौँ भन्ने नाराका साथ काठमाडौँमा असार ८ र ९ गते सम्पन्न ७ औँ राष्ट्रिय महाधिवेशनले तामाङको अध्यक्षमा १५१ सदस्यीय कार्यसमिति सर्वसम्मत चयन गरेको हो ।
अधिवेशन प्रतिनिधि सभाका सांसद तथा मोर्चाका निवर्तमान अध्यक्ष सूर्यमान दोङ लालध्वजको अध्यक्षतामा भएको थियो ।
महाधिवेशनले वरिष्ठ उपाध्यक्षमा धादिङका सोमबले तामाङ, उपाध्यक्षहरूमा दोलखाबाट हिमाली गोले, ललितपुरबाट गोपीलाल सिङ्तान, काभ्रेबाट अविरल जिम्बा, भक्तपुरबाट प्रेमकुमार लामा, मधेस प्रदेशबाट बेनीबहादुर मोक्तान, प्रदेश नं. १ बाट मनोज तामाङ, गण्डकी प्रदेशबाट हरिजंग तामाङ निर्वाचित भएका छन् ।
यस्तै महासचिवमा मकवानपुरका लिलाकुमार घलान तामाङ, उपमहासचिवमा काभ्रेका कुवेरसिं तामाङ काभ्रे, सिन्धुलीका दिर्गसिंह मोक्तान निर्वाचित भएका छन् ।
त्यस्तै सचिवहरूमा काठमाडौँबाट रक्षेबहादुर तामाङ (युनिक), सिन्धुपाल्चोकबाट मिलन तामाङ र कोषाध्यक्षमा नुवाकोटबाट उषा तामाङ निर्वाचित भएका हुन् । लामो समयदेखि निष्क्रिय रहेको माओवादीका जातीय मोर्चाहरू पछिल्लो समय पुनः सक्रिय हुन थालेका हुन् ।
मोर्चाको महाधिवेशनको शनिवार पार्टी अध्यक्ष एवं प्रधानमन्त्री पुष्पकमल दाहाल प्रचण्डले उद्घाटन गरेका थिए । मोर्चाको पहिलो बैठक भोलीबाट असार २१ र २२ गते २ दिनसम्म काठमाडौँ चल्ने केन्द्रीय सचिव रक्षेबहादुर तामाङ युनिक जनाएको छ ।
